واحد بس يتكلم
ما أنا كده مش هاعرف أسمع حاجة
طول ما الكل بيتكلم
مش هاعرف أعقل أو أفهم حاجة
مزة ماشية أهو على يمينك
صوت إمام بيقول حرام
ما أنت جايبها بطرف عينك
لزمته إيه الكلام؟!!
و مظاهرة ماشية على شمالى
بتنادى بقلب النظام
شتيمة فى حكومة؟ طب و انا مالى
لزمته إيه الخصام؟
دى الحكومة مروّقانا
شىء أكيد مافهوش كلام
شوفت شريط عمرو و روتانا؟
شوفت حوار عادل إمام؟
واحد بس يتكلم
ما أنا كده مش هاعرف أسمع حاجة
طول ما الكل بيتكلم
مش هاعرف أعقل أو أفهم حاجة
حسنين عايز يشتم جرجس
و كوهين فرحان أوى بالقفش
روبى بترقص دوللى تحسس
حمادة بقاله كتير ماوقفش
طب شوفت الرقاصة إياها
طلعت راجل أى كلام
ما هو كله نصب على تفاهة
و أهى كلها أفلام فـ أفلام؟
واحد بس يتكلم
ما أنا كده مش هاعرف أسمع حاجة
طول ما الكل بيتكلم
مش هاعرف أعقل أو أفهم حاجة
النهاردة الدنيا أهى زحمة ...
أصل إمبارح كان إضراب
بكرة هيبقى فيه عيش أو لحمة
أو بعده هناكل فـ كباب...
أو حتى تولع بقى بينا
ما بلدنا ملهاش أحباب
مبقتش تبعنا خلاص سينا
و أهو كله ماشى يكح تراب
يا عم فكك منى أنا مالى
دى دماغى مش ناقصة عذاب
يا عم فكك سيبنى فى حالى
لسه هانفتح فى أبواب؟
واحد بس يتكلم
ما أنا كده مش هاعرف أسمع حاجة
طول ما الكل بيتكلم
مش هاعرف أعقل أو أفهم حاجة
نزلت أقضى حاجة تعلينا
مش هاتصدق وصلت كام
ما هو كان معانا حشيش يقضينا
كان لزمته إيه البرشام؟
طب خلاص بقى عايزين بفرة
عفشة مية و أودة سفرة
شوف تبيع شرفك بكام؟
مانتا بعته خلاص بفكة
على لترين بنزين و سولار
هى غابة و إللى مايقبل
بالواقع ده هيبقى حمار
واحد بس يتكلم
ما أنا كده مش هاعرف أسمع حاجة
طول ما الكل بيتكلم
مش هاعرف أعقل أو أفهم حاجة
قولت اقرا فلاش أو ميكى
ما الأخبار شبه الأهرام
قبضوا على ميدو و علام
جت على ميكى و قالو حرام
أصل ميكى معاه باسبور
خطة ماشية و دايرة تدور
نية سودة و كام بروتوكول
و الله ما هاعيشوا يوم فيها
أنا مش عايز أحارب حد
و الإستفتا ملعوب فيها
أنا مش عضو فى حزب الغد
أنا نفسى بس أعيش فى سلام؟
ما الوطن العربى يكفينا؟
يا أخى كلها أضغاص أحلام؟
طب ما نحلم مع بعضينا
يا بنى ده كله كلام فى كلام؟
أتكلم قول حاجة تسلينا
طب لزمته إيه الكلام؟
ما الكلام بيجيب كلام
و أهو بدل الوحدة يسلينا
شوفت الماتش بتاع إمبارح؟
إنت معايا؟ شكلك سارح...
هدوء و محدش يتكلم
ما أنا مش هاعرف أسمع حاجة
إظاهر إن أنا بتألم
مابقاتش عارف أحس بحاجة
إظاهر إن أنا باتقطع
مابقاش بيفرق طعم الحاجة
لو عايز تتكلم زعق
أنا كده كده مش فاهم حاجة
المشاركات
هناك 3 تعليقات:
بتعبر عن تشتت و حيرة قويين أوى ، عجبتنى النهاية .
السلام عليكم ورحمة الله وبركاته
انا لقيت المدونة بالصدفة البحتة واخدت نظرة سريعة كده عليها.اول مرة ادخل عالم المدونات اللي زادت في الفترة الاخيرة بشكل غريب.اكتشفت انها عبارة عن خواطر اوقصاصات م اللي بتكتبهم ف ضهر كشكولك وانت قاعد ف محاضرة ملهاش لزمة..ولكن مع الفارق انها تكتب بشكل علني ع النت..زي متكون كده كتبتها بحط كبير ع الحيطة اللي ع ناصية شارعكوا..واي حد معدي يسيب تعليق.سوري ع التشبيه لو بايخ بس فعلا العالم ده اذهلني جدا ..خاصة اني اتعرفت عليه بعد الفيس اللي كان اخر حاجة انبهر بيها.
انامليش اوي ف النت وكده-انامش كبيرة بالمناسبة- بس حسيت فعلا اني مش عايشة ف الدنيا اول مرة اشوف حد بيقول انه بيشرب حشيش علني-مكنتش اعرف انه زي المصاصة كده- وحاطط صورة لفتاة عارية الصدر مع سؤال غريب جمبها مع ان اسمه "مصطفى ". مفهمتش برضو ايه علاقة الحشيش بالسياسة..يمكن انه بيخليك تقول اسماء صريحة وانت مش خايف لانك مش ف وعيك..
طبعا مقدرش اقول راي في المدونة لاني مش بفهم اوي ف الموضوع بس هستعير جملتك"أهلاً بكم فى عالم يكره الخجولين"
إيه يا مصطفى يا ضنايا ؟؟؟
إنت سبت البلوج و أزحت خلاص ؟؟
إرسال تعليق