كان جنب بيتنا سوق كبير

كان جنب بيتنا سوق كبير

و ألف سوق و سوق كمان

و شارعنا محكموم بالحديد

كأى شىء لما يزيد

تصبح الأصوات .. سيّان

ماتشوفش أى لون جديد

غير السواد وسط الزحام

سوق نجاسة

و سوق نخاسة

بيسموه سوق السياسة

و فى كل حتة البياعين

لا الودن سمعت أى شىء و لا عقلى شاف غير الجنان

بياع خمور بياع لبن

بياع وشوش ملهاش تمن

ما تبيع يا شيخ إنت كمان

و حل أزمة السكن

سوق نجاسة
و سوق نخاسة
بيسموه سوق السياسة

وقت السلام

بياع كلام

الجملتين ..

بقرش صاغ

جيبلك حشيش

من الشاويش

بوقيتين تعمل دماغ

بياع غنا

بياع سكات

بياع بنات

فى الضلمة تعمل معجزات

و لبس شيك و لبس ماركة

محاوطنا سور حكام بنوه

و أرزاق يتامى تروح فــ سرقة

سلع تبورو ناس تتوه

و لا سوق م الألف يبطل حركة

سوق نجاسة
و سوق نخاسة
بيسموه سوق السياسة

فكرت ياما أبعد و أطير

أطير و أودع باب حارتنا

و بعد ما لفيت كتير

رجعت تانى

علشان .. ده بيتنا