هو أنت متعرفش عبد النبى؟ عيب عليك

يوم كده من الأيام لقيت أبويا بيقوللى إنه عايز بطاقتى , سألته ليه رد بأنى لازم أطلع رخصة الصيف ده علشان أبتدى أتعلم السواقة فى الشتا , (هاطلع رخصة و بعد كده هاتعلم عليها السواقة , مش العكس يعنى !! ) المهم رحت لقيت واحد جتة كده مستنينى فى وحدة مرور أبيس إتضح إن ده سواق فى الشركة إللى أبويا بيشتغل فيا و إنه هناك علشان يساعدنى فى الإجرائات , سألته :"إنت ليك يعنى فى موضوع الرخص و كده؟"نظر إلىّ السواق شذراً و كأننى أهنته :"أنا أى جناية أخلصها , الرخص دى بالنسبة لى كلام فارغ"تمعنت جيداً فى الرجل , فلم أجد أى دلالة على أنه عضو فى الحزب الحاكم , إستكمل هو :" عارف بقى , فى الليلة بتاعة الرخصة دى يا بشمنهدس , مش مهم تكون عارف ظباط و لا حتى لوايات (جمع لواء بس بالعامية) المهم إنك علاقتك بعبدالنبى تكون كويسة
و كان السؤال حتمياً
:"عبد النبى مين؟"
نظر إلى الرجل فى دهشة :" حد فى الدنيا يبقى رايح يطلع رخصة فى أبيس و ميعرفش عبد النبى؟"
- " يا عم هو أنا بعرف أسوق أساساً علشان أعرف عبد النبى؟"
أجاب بصرامة عسكرية مفاجئة :"مش المهم السواقة المهم تكون عارف عبد النبى""
لا إرادياُ بدأت أبحث فى وجه الرجل عن إنتمائات للحزب الوطنى فلم أجد

" عبد النبى ده يا بشمهندس هو إللى ممشى الليلة دى كلها هو إللى يعرف ينجزك فى الموال ده, ده أهم واحد هنا"

بينما كنا فى إنتظار عبد النبى , جلست أنا أتخيل هذا المخلوق الإعجازى الذى يقول لشىء كن فيكون من غير وجع دماغ

و كانت مفاجئتى عندما وصل هذا الـ"عبد النبى" كان طفلاً , لست أبالغ , لقد كان حقاً طفلاً فى الرابعة عشر من عمره على أقصى تقدير , صعيدى اللهجة و الملامح و لكنه نشيط جداً و سريع الكلام , يمتلك شيئاً ما يمكننا إن نطلق عليه إسم كاريزما , صحيح هى كاريزما فقيرة و ريحتها وحشة و كلامها مش مفهوم بس الواد .. كاريزما , مشهد السائق و هو ينظر إلى و يطمئننى:" روح إنت مع عبد النبى يا مصطفى" أسى غريب قد ظهر على وجه السائق ذكرنى بفيلم الريس عمر حرب عندما سلمت غادة عبد الرازف إبنتها لثرى عربى و قالتلها روح معاه يا حبيبتى , ضحكت فى سرى عندما تخيلت نفسى بعد إنتهاء الإجرائات و أنا عائد إلى السواق باكياً و أنا أهتف :" متخافيش يا ماما أنا لسه ملاكى"
طردت الأفكار الشاذة من عقلى و بدأت أتحرك وراء عبد النبى هذا

الفكرة كلها إن عبد النبى بياخد منك عشرين جنيه و بيدى للموظف عشرة منهم بس , حسيت إن أنا بنى آدم جبلة و نتن و معفن جداً كل الناس الغلابة واقفة فى طوابير و العواجيز و إللى بعكاز و أنا بروح أمى لقيت مكانى قدام كل الناس دى لمجرد إنى أعرف عبد النبى , !!! فعلاً حسيت إنا دلوعة أمى

طبعاً بالنسبة للناس إلى ميعرفوش عبد النبى مفيش حاجة إسمها إختبار سواقة بس كان فيه إمتحان نظرى بتاع الكمبيوتر , دخلت الإمتحان و أنا قلقان جداً لأنى فعلاً مبعرفش حاجة عن السواقة , قعدت قدام الجهاز لقيت الموظفة بتزعقللى و بتقوللى أقوم , قمت فلقيتها قعدت مكانى ( إيه لعب العيال ده؟) و بقدرة قادر لقيتها بتجاوب بدل منى الإمتحان و بتقوللى مبروك و بتاخد فلوش من عبد النبى ,

خرجت من الأختبار إللى أنا مامتحنتوش
لقيت سواق تاكسى غلبان بيسألنى هو إمتحان الحاسب الآلى صعب ؟
فردت ظهرى فى ثقة (ما أنا بقيت قديم فى الليلة بقى) وضعت يدى على كتفه على طريقة يوسف شعبان فى مسلسل رأفت الهجان و قلت له بصوت محششين (علشان أبقى زى يوسف شعبان) :"الإمتحان سهل جداً بس أهم حاجة تكون علاقتك بعبد النبى كويسة"
نظر إلى الرجل فى الدهشة و لكننى لم أعيره إنتباهاً نظرت فى اللامكان و رحلت تاركاً الرجل وسط ذهوله

كنت قد بدأت فى ردود فعل ساخرة كعادتى عندما أحزن , طابور الغلابة و العجائز و المعوقين كما هو لم يتحرك قيد أنملة , سعدت نسبياً عندما وجدت تلك العبارة مكتوبة على الحائط "ما دام الحق معك فنحن وراءك" أنتباتنى مشاعر غير مفهومة عندما إكتشفت إن تلك العبارة مكتوبة على باب الحمام!!!!