الشكل الثالث عشر .. إتكلموا عربى يا ولاد الكلب

إهداء إلى
Saso

قابلت مرة بنت فى الكلية قالتلى :
"أنا مبحترمش الناس إللى بتتكلم إنجلش عمال على بطال ... أنا مقتنعة تماماً بأن الناس ممكن يكونوا متربيين كويس بس مابيتكلموش لغات .. مش فاهمة إيه موضوع الإنجلش ده؟!!! مانتكلم عربى زى ما طول عمرنا بنتكلم"
كل ده كلام كويس و لذيذ و زى الفل بس لو قولتلك إن كل إللى مكتوب ما بين قوسين ده إتقاللى بالإنجليزى!!!!!!!!!!!!!!
إيه الغباء ده ؟
أنا مش هاقعد أقول فى كلام متعاد و كلنا عرفينه عن الهوية و العولمة و على أن اليهود محافظين على لغتهم بينما أحنا بنتحول من غير مانحس لهنود حمر جدد
أنا ( بتفرج على مسلسل الدالى كتير و) مؤمن جداً بنظرية المؤامرة ... يعنى فيه ناس بره مصر و الدول العربية بتبقى كل وظيفتهم إنهم يقضوا على الهوية العربية و بياخدوا فلوس على كده بس .... و شغلهم واضح جداً بس لو أدينا لنفسنا فرصة نفكر بمنطقية
يعنى مثلاً : لما نزلت الموبايلات من غير لغة عربى لقينا نفسنا بنتكلم بالعربى
Bass el 7oroooof maktooba bel English
أنا شخصياً أعتقد أن تأخير تعريب الموبايلات حركة مقصودة جداً جداً جداً ... علشان حتى بعد كده لما الفيس بووك إتعرب برضه الناس كلها بقيت بتكتب بلغة
Gedeeeda gedan walla heya 3araby walla English... 7aga keda ma bein el benein
ليه ما هما كان ممكن يكتبوا عربى لأن ده بقى ممكن دلوقتى ... بس هما كانوا خلاص إتعودوا ...
7assbeya allah we ne3m el wakeel